En portadaGalerías de fotosSen categorizarÚltima hora

O pasado medieval de Sobrado de Trives

Da man da Asociación Cultural Folión de Sobrado, a vila recrea durante dous días a anexión do Foral á Coroa de Felipe II

Estandartes e bandeirolas de cores, escudos… Unha coidada decoración polas rúas dá a benvida á vila de Sobrado (A Pobra de Trives) na primeira fin de semana do mes de agosto, dous días nos que a vila regresa á Idade Media, máis concretamente ao momento da anexión do Foral de Sobrado e o seu Mosteiro á Coroa de Felipe II, cun completo programa de actividades vencelladas a eses acontecemetos que marcaron o devir deste pobo trivés.

Da man da Asociación Cultural Folión de Sobrado a idea nacía hai cinco anos e hoxe xa está máis que consolidada, contando coa colaboración dos veciños que se prestan a botar unha man, para converter o seu pobo nun auténtico centro medieval.

De feito, ao longo da fin de semana (1 e 2 de agosto) o mercado instalado na praza con todo tipo de postos (artesanía, gastronomía…), daba cor ás rúas mentres trovadores e xoglares deleitaron ao público con cantigas e romances, aínda que a fesa propiamente dita non arrancaba ata o sábado pola tarde. En torno ás 20:30h. igual que en anos anteriores, as Damas e Cabaleiros elixiron ao Rei das festas, que nesta ocasión foi Mª Luisa Prieto Sarmiento. Tralo desfile polo pobo, o acto remata coa coroación e pregón, así como a cea popular para tódolos veciños, seguida polo baile medieval.

Trala resaca do sábado, a festa continuou o domingo, cun gran desfile ao que nesta ocasión se sumaron dúas figuras xigantes chamadas “pantasmas” que datan do século XIX e foron recentemente restauradas pola asociación, convertidas en reis medievais tras anos de abandono. Tralo desfile chegaba o xantar e xa pola tarde, xogos, torneos e concursos populares fixeron pasar unha boa tarde aos asistentes ata o momento central do programa, a representación do Foral de Sobrado, un acto a través do cal Inés de Quiroga, última abadesa de Trives, fai petición a Felipe II para impedir a anexión do mosteiro de San Salvador de Sobrado ao de San Paio de Antealtares, de Santiago.

Con todo, o acto máis esperado polo público foi como cada ano o da representación da sentencia do Tribunal da Santa Inquisición (suposto xuizo e condea) e a posterior queima da bruxa despois de perseguila por todo o pobo, o broche de ouro a dous intensos días de festexos, lembranzas e homenaxes.

Fotos: Carlos G. Hervella.

Para máis información poden poñerse en contacto coa asociación a través do perfil de Facebook: Fulión de Sobrado, ou no teléfono: 667 64 95 44.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close