Un setembro máis, como vén facendo dende hai xa 23 anos, o Periódico O Sil acaba de poñer na rúa un amplo monográfico dedicado ás Festas do Cristo 2019 no Barco. Pode atoparse en quioscos e librerías.
Ao longo de medio cento de páxinas este número especial fai un percorrido amplo e pormenorizado polas diferentes propostas do programa desta celebración, que terá lugar do 13 ao 16 de setembro, se ben na fin de semana anterior, a do 7 e 8 de setembro, haberá xa actividades previas como un salón gastronómico ou a inauguración do festival de instalacións artísticas enBarcArte.
Así neste monográfico damos conta dos cultos relixiosos, coa referencia central do 14 de setembro na que a imaxe do Nazareno percorrerá O Barco; tamén das propostas lúdicas, musicais ou deportivas, con eventos de especial interese como o Descenso Internacional do Sil que cumpre 53 anos ou a Milla Urbana, con trinta e tres edicións ás súas costas, entre outros.
Ademais diso abordanse diferentes aspectos da actualidade municipal con reportaxes e entrevistas, así como coas aportacións dos nosos colaboradores.
