Rescatar do esquecemento oficios perdidos ou case perdidos para compartilos coa sociedade nun mesmo espazo. Con ese afán traballa o pintor e escultor soberino Modesto Trigo, que, proximamente, prevé achegar á súa vila natal parte da súa obra pictórica e tamén cadros de diferentes artistas. Proxecta a construción dun Museo de oficios perdidos en Gundivós.
A idea vai máis alá da parte artística e pretende converterse tamén nun espazo de referencia para rescatar oficios perdidos ou case perdidos, como pode ser o de canteiro. Os cadros que formen parte das exposicións explicarán a tradición histórica e con eles animará a recuperar eses oficios como unha forma para asentar poboación no rural.
Ademais do Museo, o artista ten previsto acondicionar un taller no que poder traballar as tempadas que estea en Sober, así como contar con diferentes espazos colaboradores nos que amosar a súa obra, relacionada directamente co rural da zona e a Ribeira Sacra.
Tal e como el mesmo explica “trátase de poder pintar aí e traballar no concepto de aldea global desde o lugar no que nacín. Desa maneira o traballo que se faga servirá como resonancia de Gundivós e de Sober”.
Recoñece que se trata dun proxecto “ambicioso” que reúne arte, ciencia e sustentabilidade co que non só expoñer arte, senón facerlle ver á xente que no rural tamén hai posibilidades.
O pintor, natural de Gundivós, está afincado en Madrid e a súa obra pictórica ten sido exposta por todo o mundo. Na actualidade prepara unha exposición no Museo Nacional de Ciencias Naturales de Madrid titulada ‘Arte y Ciencia’.
Fotos cedidas polo Concello de Sober.
