En portadaÚltima hora

O plan de viabilidade da piscina climatizada do Barco analizarase en comisión de Deportes

Así o adiantaba o alcalde, Alfredo García, durante a sesión plenaria do 6 de marzo
Imaxe da sesión plenaria celebrada pola Corporación barquense o 7 de marzo./ Foto: A.R.

Hai apenas dous días chegaba ao Concello do Barco o documento que recolle o plan de viabilidade da piscina climatizada do Barco. Documento que será analizado mañá 8 de marzo nunha comisión urxente de Deportes solicitada polo PP. Así o anunciaba o alcalde do Barco, o socialista Alfredo García, durante a sesión plenaria da tarde do 7 de marzo dando resposta ademais a unha pregunta formulada polo edil de Riada Cidadá, Félix Yáñez, sobre a situación do proxecto de reforma da citada instalación municipal.

“En febreiro tivemos unha reunión coa empresa contratada para facer o plan de viabilidade, que quedou en remitilo nun par de semanas. O documento chegou o pasado martes e o secretario xa está traballando nel. Mañá 8 de marzo imos celebrar unha comisión extraordinaria urxente de Deportes na que abordaremos ese plan”, indicaba o rexedor.

Ademais adiantaba que tamén durante a mañá do 8 de marzo se procederá a adxudicar o contrato da segunda obra que se executará na piscina cuberta municipal. “Dese xeito xa poderán empezar as dúas obras”, indicaba o rexedor.

Durante esta mesma sesión plenaria resultaba aprobado por unanimidade o proxecto para a urbanización da rúa Ferrol por importe de 54.500 euros, unha actuación incluída nos plans provinciais. Tamén saían adiante por unanimidade dúas mocións (unha presentada por Riada Cidadá e outra do PSdeG-PSOE) relativas á celebración do Día Internacional da Muller e á folga feminista da xornada do 8 de marzo.

Finalmente, o alcalde tamén daba conta no pleno de que no Concello do Barco vén de recibirse a notificación de que o IDAE lle concede unha subvención para a reforma da iluminación da Casa da Cultura-Teatro Lauro Olmo e do seu sistema de calefacción. O importe total do proxecto suporá un investimento duns 360.000 euros.

Lembranza no pleno a dous ex concelleiros falecidos

A sesión plenaria comezaba cunha lembranza a dous ex concelleiros do Barco recentemente falecidos, Luis Ramos e Gustavo Gómez. O alcalde do Barco manifestaba o pesar da Corporación pola súa perda e sinalaba que ese sentir trasladaráselle ás súas familias.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close