Como se viña comentando nestes últimos días, o presidente da Real Federación Galega de Fútbol (RFGF), Rafael Louzán, fixo oficial na presentación que as semifinais do play off de ascenso a 2ªB se xogarán sen público, xa que “nesta situación tan excepcional a prioridade é a saúde”. Polo tanto, o CD Barco terá que enfrontarse co SD Compostela sen o apoio dos seus seguidores nas bancadas. Sen embargo, Louzán deixou a porta aberta a que a vindeira semana se poida explorar a posibilidade de que poida haber público na final do sábado 25.
O estadio Abanca Balaídos (Vigo) acolleu esta mañá a presentación oficial da fase de ascenso, un acto no que estiveron presentes o presidente e o vicepresidente da RFGF, Rafael Louzán e Fernando Iglesias, respectivamente; o vicepresidente do RC Celta Ricardo Barros; os máximos mandatarios dos catro clubs participantes (Nilo Ramos polo CD Barco, Antonio Quinteiro pola SD Compostela, Camilo Díaz polo Ourense CF, Manolo Abalo polo Arosa SC); os catro adestradores dos equipos que se xogarán o ascenso (Manolo Pérez polo CD Barco, Yago Iglesias pola SD Compostela, Fran Justo polo Ourense CF, Rafa Sáez polo Arosa SC) e os catro capitáns (Rubén García polo Barco, Álvaro Casas pola SD Compostela, Germán polo Ourense CF, Julio Rey polo Arosa SC).
Os presidentes das catro entidades agradeceron ao RC Celta, ao Concello de Vigo e á RFGF por “remar todos xuntos nunha mesma dirección para que esta festa do fútbol galego se poida celebrar en Vigo” e, ao mesmo tempo, admitiron estar “nerviosos nas horas previas á gran cita”.
Ademais, o vicepresidente primeiro do RC Celta, Ricardo Barros, deixou constancia deste momento histórico obsequiando aos catro clubs cunha camiseta do RC Celta co nome de cada un deles. Barros sinalou que o RC Celta está “encantado de poder colaborar co fútbol galego” e desexoulle sorte aos catro participantes.
Fotos: RFGF/RFEF.
Máis información: https://osil.info/nilo-ramos-presidente-do-cd-barco-e-unha-pena-que-non-poidan-vir-os-afeccionados/
