En portadaÚltima hora

O pleno barquense aproba o prego de condicións para licitar a xestión da piscina climatizada

Este punto saía adiante só con nove votos a favor socialistas, xa que o PP e o BNG abstíñanse, mentres o edil de Riada Cidadá votaba en contra
A Corporación barquense durante a sesión plenaria extraordinaria do 18 de xullo./ Foto: A.R.

A Corporación barquense celebraba unha sesión extraordinaria na tarde do 18 de xullo en cuxa orde do día se incluía a aprobación do expediente de contratación para a licitación da xestión da piscina municipal climatizada. “Na anterior sesión plenaria traíamos a ordenanza reguladora do servizo e agora presentamos todo o expediente para poder sacalo a concurso”, explicaba o voceiro municipal do PSdeG-PSOE, Aurentino Alonso.

Deseguido detallaba que se trata dun contrato a cinco anos sen posibilidade de prórroga, cun servizo de 70 horas á semana, “igual que no anterior prego e cuns horarios idénticos”, así como cun peche técnico por limpeza no mes de agosto. Tamén inclúe medios materiais, instalacións e maquinaria e establece uns grupos mínimos de actividades, un total de doce á semana, entre outro temas. Á hora de puntuar as ofertas que presenten as empresas o Concello valorará cuestións como o criterio de menor contía pública, a ampliación do horario mínimo establecido, máis actividades, etc.

O voceiro municipal de Riada Cidadá, Félix García, aseguraba que tal e como está plantexado o expediente, a xestión “é unha ganancia pura e dura para a empresa, non hai taxa de retorno para o Concello, que si fixo un investimento de case 500.000 euros, e aínda por riba imos financiar con 100.000 euros ao ano á empresa. É certo que a piscina hai que tela, é boa para a poboación en temas de saúde e deportivos, pero sairíanos máis barata se a xestionase directamente o Concello tal e como xa fai con outras instalacións municipais como o campo de fútbol ou como o conservatorio, por exemplo”. E nese senso, anunciaba o seu voto en contra.

Pola súa banda, a voceira municipal do PP, Sabina Aguado, lembraba que, malia que na maior parte dos casos os abonos da piscina van baixar, “vai haber abonos familiares máis caros”, e que “dende hai anos prometéusenos que se ía facer a reclamación correspondente á empresa que realizou a obra por non estar en condicións. A última vez foi no pasado pleno, non imos aprobar nada mentres iso non se faga, e ademais o prazo para poder reclamar segue correndo”.

 

O alcalde do Barco, Alfredo García, durante unha intervención no pleno./ Foto: A.R.

 

Dende o partido socialista, Aurentino Alonso contestáballe que “si imos facer esa reclamación das obras, pero aínda non temos o informe final do estado no que se atopan todas as partes da instalación. A partir dese informe real faremos a reclamación, mantemos ese compromiso”.

Finalmente o prego de condicións para sacar a concurso a piscina cuberta do Barco saía adiante unicamente cos nove votos a favor socialistas (faltaba á sesión o concelleiro Orlando Saavedra), xa que PP e BNG abstíñanse e Riada Cidadá votaba en contra.

Neste pleno tamén se aprobaban, entre outros asuntos, a bonificación do ICIO nas obras de rehabilitación do CEIP Condesa de Fenosa. “Unha vez aprobado o ICIO, mañá daráselles licenza para que podan empezar a traballar no verán”, sinalaba o alcalde barquense, Alfredo García.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close