ConcellosÚltima hora

O pleno de Verín aproba por unanimidade unha declaración institucional contra o peche do paritorio

A Corporación demanda da Administración sanitaria que "se revoque a decisión de peche xa executada, que non só se manteña o actual paritorio, senón que se reforce coas medidas necesarias tanto de persoal como de recursos para darlle unha total seguridade"

Sesión plenaria na que a Corporación de Verín aprobada a declaración institucional contra o peche do paritorio de Verín./ Foto: Concello de Verín.

 

Na sesión plenaria que a Corporación de Verín celebraba no mércoresa 4 de decembro de 2019 aprobábase por unanimidade de todos os grupos presentes nesta institución (PSOE, BNG e PP) unha declaración institucional contra o peche do paritorio do Hospital de Verín.

“Contamos dende fai máis de vintecinco anos cun Hospital Comarcal en Verín, que acolle o maior e máis importante servizo público desta comarca, un hospital que leva máis dun cuarto de século influíndo positivamente na calidade de vida das veciñas e veciños de Verín e comarca. A pasada semana coñecimos a decisión do SERGAS de pechar o paritorio do Hospital Comarcal de Verín a partir do 1 de decembro. No momento en que se presenta a presente declaración ao pleno municipal, as mulleres de Verín e comarca xa non poden parir no noso hospital, tendo que trasladarse ata Ourense. Este é un dos temas que máis alarma social está provocando na nosa veciñanza”.

Tamén se indica nesta declaración que “independentemente das razóns técnicas e científicas expresadas polos Xefes do Servizo de Xinecoloxía e Pediatría, as cais non entraremos a discutir; cremos que este Servizo que se pretende pechar é fundamental para o desenvolvemento das nosas comarcas. Unhas comarcas cada vez máis deprimidas co abandono de moitos habitantes, que non atopan as oportunidades para vivir dignamente, e con esta decisión sen dúbida vai empeorar. A maior afondamento, non é compatible falar de potenciar e/ou apoiar o rural con suprimir un servizo sanitario de semellante transcendencia”.

Neste senso, os concelleiros que forman parte da Corporación verinesa manifestan o seu “frontal rexeitamento á decisión anunciada do peche do paritorio do Hospital de Verín. Queremos mostrar o noso apoio e recoñecemento a todos os profesionais da sanidade pública que desenvolven o seu labor no Hospital Comarcal de Verín, e que o fan con gran eficiencia e profesionalidade, tratando de dispensar a mellor atención de calidade a todos os pacientes. A nosa total solidariedade coas mulleres embarazadas e as súas familias para que estas poidan seguir parindo no noso hospital”.

Ademais demandan da Administración sanitaria que “se revoque a decisión de peche xa executada, que non só se manteña o actual paritorio, senón que se reforce coas medidas necesarias tanto de persoal como de recursos para darlle unha total seguridade; e que este mesmo apoio decidido se faga extensivo a cantos outros servizos ou especialidades médicas do Hospital sexan necesarios”.

 

 

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close