OurenseÚltima hora

“O pobo de Ourense ao seu fillo predilecto, Carlos Casares Mouriño”

A capital réndelle unha sentida homenaxe ao autor coa entrega do pergamino de “fillo predilecto” á familia e coa descuberta dunha placa na traseira do Liceo, na praza do Bispo Cesáreo

A cidade de Ourense vén de saldar a súa débeda con Carlos Casares Mouriño, homenaxeado este ano no Día das Letras Galegas, declarándoo oficialmente fillo predilecto da Cidade e descubrindo unha placa na súa honra na praza do Bispo Cesáreo, nunha das pareces do Liceo, “a segunda casa de Carlos e onde estará ao lado de Blanco Amor, no recuncho do lector e colocada na praza dun bispo, porque a obra máis importante de Casares é ‘Ilustrísima”, dixo o irmán do homenaxeado, Xabier Casares, durante o acto de descuberta da placa.

Pero o acto arrancou no Salón Nobre do Concello de Ourense, cunha sesión plenaria na que asistiron, como espectadores, representantes do Consello da Cultura Galega e da Real Academia Galega, entre outros. A sesión arrancou cun discurso do alcalde de Ourense, Jesús Vázquez, no que salientou “a riqueza que e diversidade da achega de Carlos Casares á nosa cidade e á nosa comunidade autónoma”. O edil primeiro reiterou que a cidade de Ourense “recibe este ano cunha especial ledicia a celebración do Día das Letras Galegas, xa que lle rende homenaxe a un dos seus fillos predilectos”. Vázquez cualificou de “acerto” a aprobación, por unanimidade, da Corporación Municipal que o 7 de febreiro de 2003 incoou o expediente de honra para recoñecer a súa traxectoria intelectual e persoal – a de Casares-. E, froito dese expediente, o Concello aprobou , en sesión plenaria do 4 de abril, nomear a Carlos Casares Mouriño, fillo predilecto da cidade e ubicar esa placa.

Tras o discurso do alcalde, a corporación municipal fixo entrega dun pergamiño ao fillo de Carlos Casares, Christian Casares Berg, que amosou a súa emoción “por todos os actos que se están a levar a cabo en honra do meu pai” e salientou que Ourense “foi unha cidade á que lle gustaba moito voltar, tanto na súa creación literaria como na súa vida”.

Descuberta da placa

Tras o acto no Salón de Plenos, cara ás doce e media do mediodía, a comitiva, formada por membros da Corporación Municipal, autoridades e familiares de Casares, foi recibida pola Coral de Ruada na Praza Maior, que os escoltaron baixo o son da gaita, e un sol de xustiza, ata a Praza do Bispo Cesáreo. Unha vez alí, a coral ofreceu un amplo repertorio de cancións e, posteriormente, procedeuse á descuberta da placa conmemorativa, obra do artista ourensán Xosé Cid, instalada na parede do Liceo.

Pero antes, o alcalde de Ourense, Jesús Vázquez, pediulle ao irmán de Carlos Casares, Xabier Casares, que interviñese: “sei que non estaba previsto pero creo que tes que falar”, díxolle o rexedor municipal. Xabier salientou que o descubrimento desta placa era moi especial polo lugar no que está emprazada. Tras el, Christian Casares, fillo do homenaxeado, asegurou que “en todas as homenaxes que se fan, a xente que se achega non di do meu pai o bo escritor que era ou o bo traballo que facía, dinme que era unha moi boa persoa, agarimosa e próxima”. O fillo resaltou que se o seu pai non tivese nacido e vivido en Ourense “a súa obra non sería a mesma” e lembrou a todos os artistas que introduciron a Casares no mundo intelectual: “Acisclo Manzano, Quesada…”, enumerou.

Tras a intervención, novamente do alcalde de Ourense, procedeuse a descuberta da placa por parte de Xabier Casares e Christian Casares na que aparece a inscripción: “O pobo de Ourense ao se fillo predilecto, Carlos Casares “.

Texto, fotos e vídeo: Carlos Asensio.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close