O potencial do can de palleiro como pastor, analizado por Medio Ambiente e pola asociación desta raza

Esta raza forma parte do patrimonio natural de Galicia e existen testemuñas históricas que demostran as súas aptitudes para o coidado do gando, segundo o presidente do Club da Raza Can de Palleiro

Cachorro de can de palleiro.

 

O can de palleiro unha raza autóctona galega con aptitudes como can de pastor, especialmente para o coidado de animais en explotacións extensivas e que pode complementar perfectamente a función dos mastíns. Así llo transmitía Ernesto Fernández, presidente do Club da Raza Can de Palleiro, entidade constituída no ano 2002 en defensa desta denominación, á directora xeral de Patrimonio Natural, Belén do Campo, na reunión mantida recentemente con ela xunto a outros representantes da asociación.

No encontro abordaban o importante papel que desempeñan estes animais na prevención de ataques ao gando por parte de lobos e xabarís e a súa presenza cada vez maior en explotacións galegas realizando labores de pastoreo e coidado do gando.

Ademais Fernández agradeceu a inclusión explícita desta raza na orde de axudas de 2019 para a prevención dos danos causados por determinadas especies de fauna silvestre. Pola súa parte, Belén do Campo lembrou que a adquisición de cans de palleiro xa fora incluída por primeira vez na convocatoria de 2018 e explicou que era unha demanda do propio sector agrogandeiro, que viña reclamando axudas para a compra de cans de pastor e concretamente, de exemplares autóctonos.

Ao respecto, o presidente da entidade incidiu en que a raza de can de palleiro forma parte do patrimonio natural de Galicia e existen testemuñas históricas que demostran as súas aptitudes para o coidado do gando, polo que considera que medidas coma esta serven para potenciar e poñer en valor a importancia desta raza autóctona.

 

Exemplar de can de palleiro./ Foto: Carlos G. Hervella.

 

Cómpre lembrar que segundo a convocatoria de axudas do 8 de xaneiro, será subvencionable a compra de cans protectores e defensores do gando cunha idade inferior ou igual a 4 meses das seguintes razas: mastín español, mastín do Pireneo e can de palleiro.

Así mesmo, os beneficiarios recibirán axudas para os gastos de identificación, debendo o interesado aportar documentación relativa aos controis sanitarios realizados ao animal, á identificación do animal e á súa inscrición no Rexistro Galego de Identificación de Animais de Compañía (REGIAC). No caso do can de palleiro, ademais, o solicitante ten que achegar o certificado da entidade xestora do libro xenealóxico da raza, como así o solicitou o propio Club da Raza Can de Palleiro.

Achegas ao regulamento

A nova Lei de Protección e Benestar dos Animais de Compañía de Galicia e o seu desenvolvemento regulamentario foi outro dos temas abordados durante a reunión. A este respecto, Belén do Campo avanzoulles que o seu departamento xa está a traballar na elaboración do regulamento da devandita lei, coa intención de que estea aprobado este mesmo ano.

Neste sentido, os representantes do Club da Raza Can de Palleiro aproveitaron a xuntanza para ofrecer a súa colaboración á consellería neste proceso e para trasladarlle á directora xeral algúns dos aspectos que desde a entidade consideran que se deberían incluír e abordar no futuro regulamento.

 

Imaxe da reunión mantida na Consellería de Medio Ambiente.

 

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies