O PP galego e leonés reivindica que “non se pare a A-76”

Celebraban un acto en defensa da autovía nas proximidades do Puente de Domingo Flórez (León)

Na N-120, na zona lindeira entre a comarca galega de Valdeorras e a do Bierzo, no Puente de Domingo Flórez (León), o PP celebraba na tarde do 21 de xuño un acto en defensa da autovía A-76. Nel participaban os secretarios xerais do partido en Galicia e Castela e León, Miguel Tellado e Alfonso Fernández, respectivamente; así como candidatos populares nas eleccións xerais por Ourense e León.

“Reunínomonos o PP de Galicia e o de León cunha mesma reivindicación: que non se pare a A-76. Nós cremos que este é un proxecto fundamental para as dúas comarcas, para as dúas comunidades, e se se produce un cambio de goberno a partir das eleccións do próximo domingo este proxecto corre risco de ser paralizado”, sinalaba o secretario xeral dos populares galegos, Miguel Tellado. Ao seu carón, Alfonso Fernández, indicía en que “cun goberno do PP este proxecto seguirá avanzando porque consideramos que é perfectamente compatible a defensa do medio ambiente e do patrimonio artístico co desenvolvemento das infraestruturas, que é algo que sempre xera oportunidades e emprego, o que nestes momentos consideramos ademais que é fundamental”.

Asemade o candidato ao Congreso por Ourense, Celso Delgado Arce, lembraba que “levamos moitos anos pelexando por esta autovía” e explicaba en qué momento se atopa o proxecto. “Temos unha autovía entre O Barco de Valdeorras e Ponferrada moi avanzada en canto á súa tramitación, co cal, se hai gobernos que estean empeñados en dedicar recursos presupuestarios a esta actuación e a seguila considerando prioritaria, poderase facer”.

Nese senso, Delgado Arce recordaba tamén a votación do pasado 13 de abril no Congreso dos deputados na que o PP presentaba unha iniciativa sobre esta autovía. “Simplemente dicíamos que queríamos que siga sendo prioritaria e que se continuase apoiando orzamentaria e administrativamente, pero atopámonos cunha moi desagradable sorpresa. A iniciativa saíu adiante, pero foi votada en contra por Podemos, e os seus argumentos foron que non a necesitamos porque é suficiente con que levemente retoquemos a infraestrutura actual, que non hai intensidade suficiente de tráfico que a xustifique, e que non sei vai gastar diñeiro cando no país hai outras necesidades. E logo engadiron que medioambientalmente habería problemas na Serra de Enciña da Lastra. Todas estas argumentacións caen polo seu propio peso”.

O candidato ourensán concluía indicando que “este é un proxecto de todos e por iso buscaremos consensos e apoios con todos os grupos para sacala adiante, pero unha ameaza nova cérnese, que Podemos entre no goberno e paralice esta autovía”.

Fotos: Carlos G. Hervella.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies