O alcalde do Barco, Alfredo García, asinou este mediodía en calidade de presidente da Fegamp un manifesto de adhesión para loitar contra a pobreza de forma conxunta coa administración autonómica. O documento tamén foi subscrito pola Rede Galega de Loita contra a Pobreza e a Exclusión Social e o conselleiro de Política Social, José Manuel Rey Varela. Deste xeito, ambas entidades adhírense á axenda social única elaborada pola Xunta nun acto que presidiu o seu titular, Alberto Núñez Feijóo.
Neste senso, o presidente do goberno autonómico valorou o documento: “co compromiso que temos coas familias que teñen menos recursos, e especialmente coas familias con nenos a cargo, asinamos esta Axenda Social Única para dar un novo impulso ás familias con máis dificultades”, salientou.
Feijóo explicou que con este acordo “plasmamos a coordinación que nos esixe a Lei de Servizos Sociais, que pon de manifesto que esta competencia non é exclusiva de ninguén, senón compartida entre a comunidade e os concellos”.
Así, o documento asinado pon de manifesto que a Axenda Social contemplará medidas dirixidas de xeito prioritario a fogares con menores de 16 anos a cargo e con ingresos de traballo inferiores aos limiares da Risga.
Nesta liña, a Federación Galega de Municipios e Provincias e a Rede Galega de Loita contra a Pobreza e a Exclusión Social comprométense a colaborar e cooperar no desenvolvemento das devanditas medidas, así como promover a inclusión social das persoas e familias máis vulnerables, paliando deste xeito os efectos da exclusión.