A aula de psicomotricidade do Pavillón Municipal de Deportes de Verín acollerá todos os martes e xoves de 11 a 12:30h. as novas sesións do programa infantil Kero Kolo.
Trátase dunha iniciativa que busca converterse nun espazo de encontro entre familias e menores (de 0 a 3 anos), acompañados pola persoa directora das sesións, asentando así as bases para unha sólida educación e convivencia con outros iguais.
O programa ten por obxectivo crear unha serie de actividades de interacción e participación entre os menores e as familias nas que se desenvolven iniciativas de educación infantil conxuntas e propostas polos participantes, é dicir, unha aula de convivencia que será unha antesala de entrada ao centro educativo e a compartir experiencias cotiás.
As inscricións pódense realizar no Servizo de Educación e Apoio familiar situado na Casa da Xuventude ou no teléfono 988 41 476.