OurenseÚltima hora

O proxecto da Intermodal “pretende mellorar a permeabilidade da cidade”

O Concello convocou unha xuntanza ténica, á que acudiron axentes sociais, políticos e económicos da cidade, para aclarar as dúbidas sobre a nova Estación do AVE de Ourense

Xornada técnica ferroviaria en Ourense. O Auditorio Municipal acolleu, finalmente, a Presentación Técnica do proxecto da Estación Intermodal do AVE da capital. Esta presentación foi ideada polo alcalde de Ourense, Jesús Vázquez, “para esclarecer todas as dúbidas aos axentes sociais e políticos da cidade” dixera cando se convocara. Pero esa xuntanza non estivo exenta de polémicas, xa que fóra convocada para o 12 de xuño e suspendida unha hora antes da súa celebración porque un técnicos do estudio de Foster non puidera acudir por motivos persoais.

Finalmente o día chegou, e o equipo de Foster+Partners presentou o seu proxecto arquitectónico para a nova Estación Intermodal de Ourense que ten como obxectivo “a mellora da permeabilidade da cidade”, dixo o responsable técnico de Foster, Pablo Urango.

Neste acto de presentación técnica acudiu o alcalde, Jesús Vázquez; o presidente de Adif, Juan Bravo Rivera; o presidente da Deputación, Manuel Baltar; a conselleira de Infraestruturas, Ethel Vázquez; os membros da Comisión de Seguimento da chegada do AVE no Concello de Ourense; e representantes de asociacións, colectivos e entidades sociais, veciñais, empresariais e profesionais da cidade.

Así, a futura estación da cidade das Burgas, terá un aparcadoiro subterráneo e unha Estación de Autobuses “garantindo a intermodalidade”. Tanto a Estación de Autobuses como o aparcadoiro, que será soterrado e terá 300 prazas, correrán a cargo da Xunta de Galicia, que investirá 10 millóns. Pola súa banda, Adif será a encargada de facer a adaptación da praia de vías para a chegada da Alta Velocidade a Ourense, devandita actuación terá un custo de 140 millóns de euros.

No eido do edificio de viaxeiros, as a tuacións a levar a cabo son ampliación do vestíbulo “converténdose nun espazo diáfano a triple altura”, dixo o técnico, garantindo “o fluxo de pasaxeiros e abranguerá zonas comerciais e zonas de agarda”. Asemade, o soterramento do aparcadoiro conseguirá que diante da estación “haxa unha praza con zonas verdes e unha fonte que lle diga ao viaxeiro que acaba de chegar á cidade da auga”, dixo Urango. Sobre esta praza instalarase unha nova parada de taxis “que aumentará a súa capacidade”, as zonas de parada momentánea para deixar ou recoller viaxeiros e aparcadoiros de motos e bicicletas. Todo este proxecto de Foster tamén contempla a instalación dunha pasarela peonil “que unirá os barrios da Ponte e Vinteún” e unha “caixa de vías” que substituirá á actual ponte da avenida de Santiago e servirá tamén para unir ambas as dúas zonas “e solucionar o problema do barullo dos trens”, asegurou o técnico. Esta caixa de vías converterase tamén nun espazo con zonas verdes e de paseo.

No exterior, contémplase unha gran cuberta formada por unha serie de planos de formigón sobre esveltos alicerces, entendida como a forma máis eficiente e con mínimo mantemento para proporcionar protección fronte ás choivas e a calor estival de Ourense. Concibido como un sistema modular que permite futuras ampliacións, a cuberta intégrase co edificio histórico e esténdese sobre a nova praza.

En canto á praia de vías, o autor do proxecto, Tomás Mañas, explicou que van facer dous novos andeis e catro vías de ancho estándar internacional “para a chegada do AVE a Ourense”, asegurou. No resto da praia de vías manterase o ancho ibérico “para os traxectos rexionais”.

Finalmente, foi a quenda de explicación da Xunta para a Estación de Buses e o aparcadoiro soterrado. A técnico especialista da Consellería de Infraestruturas e Transporte, Lorena Pardiñas, explicou que a complicación coa que se atoparon á hora de facer o edificio intermodal era o Centro de Saúde da Ponte. Finalmente, para resolver o problema, proxectaron a estación de tal xeito que diante “quede unha zona verde de 15 metros de ancho que sirva como punto de paso entre o Centro de Saúde e a propia Estación de Ferrocarril”. Asemade, o punto de venda de billetes da Estación de Autobuses confluirá con ese vestíbulo da Estación de Tren “para garantir esa intermodalidade”, explicou. A entrada dos buses será pola rúa Eulogio Gómez Franqueira e instalarase unha rotonda ao final para que os autobuses poidan dar a volta. En total, esta nova Estación, terá 15 dársenas para autobuses.

Texto e fotos da xuntanza: Carlos Asensio.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close