O proxecto de recuperación e estudo do Castro de Doade dase a coñecer no Barco

Manuel Blanco vén de presentar no Casino o seu libro “O Segredo do castro de Doade” (A Formiga Rabicha)

Chegar a desenvolver a escavación arqueolóxica dun castro dende unha asociación non resulta nada doado. E tampouco chegar a depositar o material recuperado nun museo propio. É difícil, pero non imposible e así se demostra co asentamento do Castro de Doade (na comarca pontevedresa do Deza), tal e como contaba un dos impulsores desta iniciativa, Manuel Blanco Villar, que presentaba na tarde do 25 de xaneiro o seu libro “O Segredo do castro de Doade” (A Formiga Rabicha) no Casino do Barco.

Trátase dunha obra divulgativa e pensada para o público en xeral que pretende amosar a cultura castrexa e os asentamentos deste tipo que existen na comarca do Deza, entre os que está o de Doade. O traballo reúne os traballos e actuacións desenvolvidos ata a actualidade neste xacemento (cuns 105-120 m de diámetro exterior e cuxa muralla chega aos 7 m na parte máis alta), explica as súas estruturas habitacionais e as súas características principais, entre as que sobresae o sistema defensivo, “do que temos localizados dous foxos, pero pensamos que pode haber un total de cinco. Para ser un castro tan pequeno é realmente un sistema defensivo impresionante”, destacaba Manuel Blanco.

Neste volume tamén se resumen as intervencións arqueolóxicas realizadas ata o momento nel, dirixidas por José Manuel Caamaño Gesto. Foron un total de 5 campañas en catro anos, que permitiron recuperar 21.091 restos que se atopan depositados no Museo Casa do Patrón, na mesma zona. Neste castro están datados tres períodos de ocupación diferentes: do século IV ao II antes de Cristo, do s. II a d. C. ao II despois de Cristo e do s. IV ao V d. C.

Durante a súa exposición, Manuel Blanco tamén se refería ao proxecto do Museo Casa do Patrón, as súas salas, fondos e actividades, así como ao labor de restauración desenvolvido na aldea de Codeseda. Neste acto o autor do libro, que avanzaba novos proxectos como continuar coas campañas de escavacións e editar un libro científico sobre o castro, estaba acompañado polo editor do libro e ilustrador Miguel Ángel Martínez Coello, polo impresor Avelino Jácome (autor de “A lenda de Aldara e Galael”) e polo presidente do Instituto de Estudos Valdeorreses, Aurelio Blanco. Ademais a neta do autor, María, recitaba un poema incluído no libro (“A memoria do meu castro) e Amparo Blanco daba lectura ao epílogo da obra.

Fotos: Carlos G. Hervella/ A.R.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies