PolíticaÚltima hora

O PSdeG celebrará o seu 14º Congreso os días 7 e 8 de decembro en Santiago

Valentín González Formoso será proclamado secretario xeral o 7 de decembro e compartirá escenario con Pedro Sánchez na clausura, o 8 de decembro

 

O PSdeG celebrará os días 7 e 8 de decembro o seu 14 Congreso co lema “A Galicia que Avanza” e co obxectivo de “abrir unha nova etapa de modernización” das estruturas do partido. Así o anunciaban na presentación do seu programa Blas García, Teresa Facal e Ana Pena como representantes da Comisión Organizadora.

O cónclave comezará coa proclamación de Valentín González Formoso como secretario xeral e contará coa asistencia de Pedro Sánchez para a clausura, o mércores día 8. O encontro mobilizará a máis de 1.000 militantes citados o próximo martes no Pazo de Congresos de Santiago de Compostela, incluíno aos 500 delegados e delegadas elixidos nas agrupacións locais.

Blas García explicou que o propio lema do congreso foi escollido en sintonía coa liña marcada pola dirección federal incluíndo, ademais a particularidade galega para abrir “unha nova etapa na que deixemos claro que hai outra Galicia que sae dos gobernos socialistas nos concellos e as deputacións galegas”. Puntualizaba que o PSdeG traballará para poñer en valor aos máis de 10.000 militantes cos que conta, e que constitúen “o activo máis importante” co que conta a organización.

A xornada inaugural acollerá, sinalou, a apertura e proclamación de Valentín González Formoso logo de vencer nas eleccións primarias do PSdeG, que intervirá xunto co secretario de Organización do PSOE, Santos Cerdán. Neste día estarán convidados os ex presidentes socialistas Emilio Pérez Touriño e Fernando González Laxe, ademais de representantes dos sindicatos galegos e dos socialistas de Portugal.

O programa dese día incluirá o informe de xestión do anterior secretario xeral e serán debatidas as 2.148 emendas presentadas á ponencia marco. Xa pola tarde someteranse a votación dos ditames das cinco comisións do congreso, que analizarán as “Institucións ao servizo do país”, a situación económica de Galicia, políticas de benestar, territorio e sustentabilidade e modelo de partido e os estatutos de organización para os próximos 4 anos.

 

 

A segunda xornada do congreso, a do 8 de decembro, comezará coa votación dos órganos nacionais galegos, que son a Comisión Executiva Nacional Galega, o Comité Nacional Galego, o Comité Federal e a Comisión de Ética.

Como remate terá lugar a clausura do evento a cargo do novo secretario xeral, Valentín González Formoso, xunto co secretario xeral do PSOE e presidente do goberno, Pedro Sánchez.

Emendas

Blas García salientou o traballo inxente da Comisión organizadora do Congreso, que en menos de 30 días culminou a preparación dun certame que normalmente levará dous meses de dedicación. Neste traballo inclúe a xestión das 2.148 emendas presentadas á ponencia marco do 14 Congreso do PSdeG.

Entre as emendas presentadas polas agrupacións sinalou a reclamación dos colectivos feministas subliñando que “a igualdade ten sexo”, así como varias aportacións dirixidas a modernizar as estructuras do partido. Apelou tamén a necesidade de conformar canto antes unha alternativa política aos gobernos conservadores de Núñez Feijóo.

García destacaba do novo secretario xeral, González Formoso, que “é unha persoa que ten unha destacada capacidade de diálogo e integración, como se verá no Congreso”. E sinalaba que “é preciso un PSdeG no que todos rememos na mesma dirección”.

Artigos relacionados

Back to top button