Nunha rolda de prensa celebraba esta mañá en Ourense, o PSdeG-PSOE vén de informar de que vén de presentar unha moción na Deputación de Ourense para que este organismo provincial deixe de xestionar “de forma escurantista” a estación de montaña de Manzaneda. Neste acto participaban o secretario provincial e
voceiro do PSdeG-PSOE de Ourense, Rafael R. Villarino; o deputado e tenente de alcalde do Barco de Valdeorras, Aurentino Alonso; e do alcalde de Manzaneda, Amable Fernández.
Así, esta iniciativa insta aos gobernos provincial e autonómico (accionistas maioritarios de Meisa) ao “cese da actual xestión escurantista”, para que “comecen a aplicar un modelo público, transparente e coa esixencia de que, quen estea á fronte, conte con experiencia e solvencia acreditada”.
Nesa iniciativa tamén se reclamará á Xunta “nomear como membros do consello de administración de Meisa ao alcalde de Manzaneda e á alcaldesa da Pobra de Trives, para garantir a representatividade dos territorios nos que se asenta a estación de montaña de Manzaneda e a transparencia na súa xestión”. Igualmente solicita á Deputación a que proceda “a concluír as obras de remodelación na estrada de acceso sen dilación”.
O deputado, Aurentino Alonso, asegurou que o proceso de adxudicación da xestión “está nunha situación tráxica” e a estación “case en encefalograma plano”, polo que “hai darlle unha volta ao modelo de xestión” e “ás actividades que só se centran no esquí e que non pensan en que o futuro da estación precisa ser repensado mediante outras vías de negocio, como están facendo outras estacións”.
“Queremos que sitúen á fronte a un experto ou experta con experiencia e non que coloquen a calquera”, sinalou logo de explicar que reclaman “transparencia” tras “anos denegando documentación”, unha situación que se agravou “co sinsentido de sacar aos concellos de Trives e Manzaneda do consello de administración”.
O secretario provincial e voceiro, Rafael R. Villarino, resaltou que o potencial da estación “leva anos estragándose” a pesar de “investimentos multimillonarios” e “cun abandono das instalacións e do modelo de
negocio”, xa que “non só é unha estación de esquí xa que é unha estación de montaña con boas instalacións que permiten actividades todo o ano”. O PSOE ofrécese para “cambiar as cousas a mellor, co fin de que
Manzaneda teña futuro”, proclamou.
Pola súa banda, o alcalde de Manzaneda, Amable Fernández, incidiu nas “decenas de traballadores, persoas da zona, que están en ERTE” a pesar de que Manzaneda “está completamente abandonada” e “a día de hoxe segue todo pechado. Chegas arriba e non podes comprar nin unha botella de auga”. Ademais, o rexedor lembrou que “a nosa reivindicación principal é que os municipios nos que se asenta esteamos no consello. Hai que investir cartos e facer unha xestión eficiente con actividades todo o ano, como sucede noutras estacións iguais”, dixo.
Para o alcalde de Manzaneda a estación “é un motor para a hostalería e o comercio de todos os municipios da zona”, un motor, insistiu, que está “totalmente desaproveitado a pesar de que por alí chegaban a pasar 4.000 ou 5.000 persoas ao día co que iso supón en cartos”.
Para o PSOE “o desleixo que Xunta e Deputación amosan coa dinamización da estación e das comarcas afectadas é recorrente desde hai lustros” cunha “xestión escurantista salpicada de problemas e irregularidades
cada vez máis evidente, especialmente desde que acordaron deixar fóra da toma de decisións aos concellos de Trives e Manzaneda”.
