A provincia segue a promocionarse como destino turístico en Madrid na feira internacional de turismo FITUR. Nesta ocasión a gastronomía volveu ser a protagonista, en concreto, unhas das festas gastronómicas máis antigas e multitudinarias de Galicia, a Festa do Pulpo do Carballiño. Esta cita congregou a preto de 100.000 persoas que consumiron arredor de 70 toneladas de pulpo coas que se elaboraron unhas 150.000 racións. O alcalde de O Carballiño, Francisco Fumega, lembrou que, como anticipo a esta “magna romaría” elaborouse a tapa de pulpo máis grande do mundo, “un prato de cinco metros de 37 centímetros de diámetro, que contiña 750 kilogramos de pulpo, equivalentes a unhas 2.000 racións”, cifrou o rexedor municipal, que destacou esta fazaña coma un “fito na historia desta festa” e que esperan superalo na próxima edición, “aínda que non será doado”, dixo.
O evento promocional desenvolveuse no posto que Galicia ten na feira, e estivo organizado e presidido pola directora de Turismo de Galicia, Nava Castro. No acto tamén estiveron presentes o concelleiro de Turismo, José Manuel Dacal, e o voceiro do grupo municipal popular, Argimiro Marnotes. O presidente da Xunta, Alberto Núñez Feijóo, tamén estivo presente na presentación carballinesa.
Na súa intervención, Fumega destacou os cinco elementos que garanten o éxito da festa durante cada edición: a tradición e o bo facer das pulpeiras e pulpeiros do Carballiño; o viño do Ribeiro; o pan de Cea, e un contorno natural extraordinario como é “o parque municipal, con máis de 30 hectáreas de arborado e zona verde”, lembrou.
Finalmente, referiuse ao obxectivo de lograr a internacionalidade. Ao respecto, dixo que a Festa do Pulpo do Carballiño “conseguiu certa relevancia en Galicia e no resto de España, e desexamos traspasar as fronteiras nacionais para que chegue a outros países”. Con este obxectivo, o pasado ano dedicáronlle a festa a tres cidades do Norte de Portugal e, a deste ano, vana dedicar a outra cidade europea. Fumega convidou a todos os presentes a acudir este 14 de agosto “onde vos recibiremos cos brazos abertos na LV Festa do Pulpo do Carballiño”.