Reto superado con creces. Na xornada do domingo 24 de xaneiro, o membro do Club Atletismo Rúa Iván Dosantos lograba unha importante xesta: completar os 65 quilómetros do tramo do Camiño de Inverno entre Ponferrada e A Rúa nun tempo total de 8 horas e 20 minutos, escribindo así “unha das páxinas máis gloriosas do noso club”, asegura o presidente, Fernando Navarro.
Segundo a presidenta da Asociación de Amigos do Camiño de Inverno por Valdeorras, Asunción Arias, trátase dun “desafío heróico que ninguén antes fixo”. Iván saía de Ponferrada ás sete da mañá e chegaba a Fontei ben entrada a tarde, onde era recibido, entre outros, por membros da asociación do Camiño de Inverno, entre eles Elvira Rodríguez Sotelo, presidenta da Asociación de Veciños de Fontei.
