Entre os establecementos comerciais que participarán na nova edición da campaña “Días Azuis”, que se celebrará do 7 ao 30 de xuño, estarán boa parte dos do Barco Centro Comercial Aberto (CCA). Esta iniciativa, que aposta por dinamizar o comercio de proximidade, vén de presentarse esta mañá en Santiago nun acto no que participaban representantes da Federación Galega de Comercio, Xunta de Galicia e Abanca, promotores da campaña.
Na presentación interviña o director xeral de Comercio e Consumo, Manuel Heredia, que destacou que durante estas semanas o obxectivo da campaña é visibilizar os establecementos que están a pé de rúa e dinamizar o comercio de proximidade, máis despois dun ano difícil provocado pola chegada do Covid-19. Neste sentido, animou aos galegos a comprar e apoiar a actividade deste tipo de locais ao longo de todo o ano.
Os clientes dos comercios que realicen as súas compras entre estas dúas datas deberán rexistrar o seu tícket en www.diasazuis.com, ou ben solicitar que a rexistre o propio comerciante.
Entre todos os participantes sortearanse un total de 12.000 euros en 64 tarxetas prepago: 24 de 250 euros e 40 de 150 euros, que deberán ser utilizadas polos gañadores nos establecementos tradicionais galegos antes do 30 de xuño do próximo ano. O sorteo, ante notario, realizarase o vindeiro 5 de xullo.
A iniciativa enmárcase no Plan de medidas específicas de apoio ao comercio de Galicia que a Xunta está a desenvolver para facilitar a dixitalización do sector e incentivar o consumo. É o caso do Bono Activa Comercio, que ofrece 30 euros de desconto para compras en establecementos locais, podendo chegar a 330.000 clientes en toda Galicia.
