O Concello de Ourense prestou asesoramento técnico a un total de 177 proxectos empresariais a través do seu Servizo de Emprego durante o primeiro semestre do ano. En total 207 emprendedores acudiron neste período ao Centro de Iniciativas para solicitar información de cara á posta en marcha das súas iniciativas. Así mesmo, os técnicos municipais tamén apoiaron a 95 emprendedores que puxeron en marcha empresas ou iniciaron actividade profesional como autónomos.
Os sectores onde se rexistrou unha maior actividade emprendedora foron os do comercio polo miúdo e a hostalaría. Segundo os datos, foron 64 e 42 negocios novos, respectivamente, que representan un 36,17% e un 23,73% do total de 177.
En canto ao perfil, a maioría dos emprendedores son mulleres, cun 54,6% fronte ao 45,4% de homes. Por idades, o 72,47% son maiores de 30 anos. E segundo o nivel de estudos, o 66,18% son non universitarios.
Tras o asesoramento, 82 persoas déronse de alta como autónomos, creáronse oito sociedades civís, tres limitadas e dúas cooperativas.
O servizo municipal asesora gratuitamente a persoas que desexen pór en marcha algún tipo de negocio. Préstase dende as instalacións do Centro de Iniciativas Empresarias, na rúa Padre Feijóo, no Casco Vello.
