O club ourensán de natación sincronizada pode dicir que está entre os grandes de España. Así o demostraban a comezos de xullo coa participación no XVII campionato de España infantil de natación sincronizada celebrado en Alicante.
Tal como explican dende o Sincro Ourense, as ourensás acudían co obxectivo de situarse na metate superior da clasificación nas distintas probas que disputaron e cumpríano con creces. Na proba de figuras, dos 40 clubs participantes, as do Sincro ocuparon o posto 13º, “destacando a nivel individual os postos 52º de Eyén Díaz e 70º de Ana Moyano, dun total de 367 participantes”, puntualizan dende o club. Na proba de equipo libre, as ourensás ocuparon o posto 15º coa súa rutina “Ocean”, a escasas décimas de meterse na final. Na modalidade de combinado, acabaron no posto 16º coa súa rutina “Robots”.
E no que respecta á clasificación final por clubs, o Ourense finalizou no posto 15º, sendo ademais o mellor dos galegos participantes en cada unha das probas disputadas, “demostrando que o seu triunfo en todas as pruebas do recentemente disputado campionato galego, non fora casualidade”, aseguran dende o club, destacando a experiencia vivida pola nadadoras que compartiron escenario e puderon ver de preto a profesionais como Gemma Mengual e Ona Carbonel que presentaron as rutinas que levarán aos Xogos Olímpicos de Río 2016, no marco do Trofeo Infantas de España que tamén se disputaba en Alicante.