En portadaGalerías de fotosÚltima hora

O tradicional corte de bacelos abre a XXXVII Feira do Viño de Amandi, en Sober

A apertura oficial nesta edición corría a cargo da Adega Mezquita e contaba tamén coa presenza do conselleiro de Economía, entre outras autoridades

Os viños dun total de 22 adegas soberinas poderán degustarse na fin de semana do 8 e 9 de abril no marco da XXXVII Feira do Viño de Amandi, cuxo recinto feiral está instalado ao pé do Concello de Sober. A inauguración oficial da mostra tiña lugar ás doce do mediodía do sábado 8 de abril co tradicional corte de bacelos.

Desta volta a apertura corría a cargo da Adega Mezquita, en lembranza do seu fundador Pedro López Fernández, e nela contábase coa presenza do conselleiro de Economía, Emprego e Industria, Francisco Conde, que estaba acompañado polo alcalde de Sober, Luis Fernández Guitián, e pola deputada autonómica Raquel Arias.

Francisco Conde destacaba o potencial exportador do sector vitivinícola da provincia de Lugo, dando como dato que no ano 2016 facturou ao exterior 3,2 millóns de euros, fundamentalmente cara países como Portugal e EEUU. Ademais o conselleiro aseguraba que a Denominación de Orixe Ribeira Sacra “conta con todas as características que definen a marca Galicia Calidade; unha materia prima única, un labor por innovar sen renunciar á tradición e o esforzo por traspasar fronteiras”.

A partir de aí as autoridades iniciaban un percorrido polos expositores e o público, ao ritmo do grupo de música tradicional do Agadic, comezaba tamén a catar as diferentes marcas. Nesta edición a mostra conta cos expositores de: A Man de Prado (Bolmente), Algueira (Doade), As Muras (A Carqueixa-Proendos), Barbado (Proendos), Cividade (Outeiro-Bolmente), Cruceiro (Vilachá-Doade), Don Bernardino (Cima de Vila-Brosmos), Estrela (Vilachá-Doade), Guímaro (Sanmil-Brosmos), Gullufre (Lobios), Lucenza (Corbelle-Proendos), Malcavada (Rosende), Marcelino I (A Carqueixa-Proendos), Naz (Naz de Abaixo-Rosende), Petrón (Doade), Proencia (Sansillao-Proendos), Rectoral de Amandi (Igrexa-Amandi), Regina Viarum (Doade), Tear (Suairexa-Figueiroá), Val da Lenda (Cantón-Amandi), Viña Cazoga (O Pacio-Amandi) e Viña Peón (O Barrio-Figueiroá).

O programa da mostra continuará pola tarde coa precata oficial da feira no Centro Sociocultural de Sober, que se completará na mañá do 9 de abril coa cata final. Ás 18:30h. terá lugar un concerto da Banda de Música de Sober e ás 22:30h. a actuación da cantante Rosa Cedrón, que ao día seguinte ás 13h. será a encargada de ler o pregón desta edición da feira.

Ao carón da feira, o público tamén pode visitar a mostra das pezas resultantes do concurso de talla con motoserra, que se celebraba por vez primeira este ano entre o 1 e o 7 de abril.

Fotos: Carlos G. Hervella.
Máis información na edición en papel do Periódico O Sil.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close