Ao longo de cinco horas desenvolvíase na xornada do 10 de outubro en Lugo o Túnel do Viño da D.O. Monterrei coa asistencia de máis de 70 persoas. A actividade, dirixida polo sumiller Luis Paadín, prolongábase dúas horas máis das inicialmente previstas “debido ao éxito de participantes, profesionais da hostelería e restauración, sumilleres, distribuidores, alumnos e profesores de escolas de hostelería”, tal e como destacan dende o Consello Regulador da D.O. Monterrei.
Os asistentes descubriron as diferentes tipoloxías de viños brancos e tintos que se elaboran nesta denominación. En concreto cataban os viños de 19 adegas desta zona produtiva: Pazos del Rey, Ladairo, Gargalo, Castro de Lobarzán, Quinta do Buble, Crego e Monaguillo, Terras do Cigarrón, Triay Adegas de Oímbra, Pazo Blanco Núñez (Tapias Mariñán), Boo-Rivero, Manuel Guerra Justo (Vía Arxéntea), Concepción Paradela Martínez, Pazo de Valdeconde, Tabú, Franco Basalo, Alba Al-Bar (Daniel Fernández), Fausto Rivero Pardo (Quinta Soutullo), Trasdovento e Pazo das Tapias.
Ademais recibiron información sobre a historia, características edafoclimáticas, orografía, variedades de uva e tradición vitivinícola nesta comarca do sur de Ourense. Esta iniciativa está incluida dentro do programa de accións promocionais de Monterrei para o ano 2018, que achegou os viños da denominación a cidades como Bilbao, León, Barcelona, Santander, Ourense Madrid ou A Coruña.
