O valdeorrés Isidro García Tato, na inauguración da mostra do 75 aniversario do IEG Padre Sarmiento

A exposición conmemorativa terá itinerancia polas catro provincias galegas e tamén chegará á Casa de Galicia en Madrid

O 30 de novembro de 1943, trala desaparición do Seminario de Estudos Galegos, acordábase a creación do Instituto de Estudos Galegos Padre Sarmiento (IEGPS), adscrito ao Patronato de Humanidades Marcelino Menéndez Pelayo do CSIC, sendo constituído formalmente o 15 de febreiro de 1944. 75 anos despois, a institución conmemoraba o aniversario cuha serie de actividades ás que pon o broche de ouro unha exposición que percorre a súa historia e resalta o seu significado, profundizan na súa contribución no ámbito da humanística galega contemporánea.

Na primeira parte da mostra, unha docena de paneis explican ao visitante a traxectoria histórica do Instituto lembrando os antecedentes e primeiros pasos, así como aos protagonistas do seu posterior devir. Tamén ocupa un lugar destacado a importante contribución científica e cultural da institución, particularmente a través das súas múltiples publicacións. E xa na última parte, composta por oito paneis, destacan as diferentes coleccións histórico-artísticas e arqueolóxicas que atesora. “Entre elas figuran algúns obxectos singulares e un número non menor de obras asinadas por moi recoñecidos artistas galegos”, explica o director do Instituto. Como peche, hai varios paneis que destacan a importancia da biblioteca do Instituto, cun fondo supera os 50.000 volúmenes, además de algunhas coleccións documentais, entre as que destaca a de debuxos arqueolóxicos do estudoso Xosé Antón G. González-Ledo, composta por máis dun milleiro de láminas.

 

O conselleiro de Cultura Román Rodríguez durante a súa intervención na inauguración da mostra.

 

A inauguración da exposición tiña lugar na mañá do 24 de xuño no Hostal dos Reis Católicos en Santiago de Compostela, presidida polo conselleiro de Cultura e Turismo, Román Rodríguez e contando coa presenza do delegado institucional do CSIC en Galicia, Antonio M. De Ron, do director do Instituto, Eduardo Pardo de Guevara y Valdés e do historiador e investigador valdeorrés Isidro García Tato (membro do CSIC).

Na súa intervención, o titular de Cultura destacou o compromiso do Padre Sarmiento “no desenvolvemento de Galicia desde o coñecemento de Galicia”. Nesta liña, explicou que na mostra se expón a historia “dun centro de investigación senlleiro, que foi durante toda a súa historia, e é na actualidade, un referente indiscutido e indiscutible no estudo das humanidades, dentro e fóra da nosa Comunidade”, e concluíu subliñando que “a súa óptica sempre foi galega e a súa referencia sempre foi Galicia”, polo que agradeceu o compromiso e labor de todas as persoas que durante este tempo pasaron polo Instituto.

Baixo o título Instituto de Estudos Galegos Padre Sarmiento. 75 anos ao servizo de Galicia (1944-2019), a mostra temporal poderá visitarse no Hostal dos Reis Católicos ata o vindeiro 15 xullo. Despois terá itinerancia polas catro provincias galegas e tamén estará exposta na Casa de Galicia en Madrid.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies