José R. Rodríguez, xornalista e escritor ourensán natural de San Xoán de Río, vén de ser condecorado polo Goberno da República de Chile coa “Orde ao Mérito Gabriela Mistral” no grao de Comendador. O propio ministro chileno de Cultura, Ernesto Ottone foi o encargado de entregarlle o galardón nun acto oficial conmemorativo dos 130 anos da Academia Chilena da Lingua, celebrado en Santiago de Chile.
Residente en A Pobra de Trives, Rodríguez ten un extenso currículum profesional. É Académico correspondente da Real Academia Española (RAE) así como das Academias da Lengua de Estados Unidos, Chile e El Salvador. Foi durante moitos anos delegado xeral da Axencia EFE para o Sudeste asiático e o Pacífico e director do Instituto Cervantes en Manila (Filipinas), posto que deixou hai uns anos aínda que o seu espírito xornalístico non lle permite estar afastado do sector. Actualmente é director do Consello de Administración do periódico The Standard de Manila, e conselleiro da Confederación de Organizacións Empresariais e da Cámara de Comercio de Filipinas.
Tampouco deixa de lado a súa faceta literaria e entre as súas publicacións máis recentes está a obra “Primeras páginas en la historia de Filipinas” no que recolle a historia do arquipélago asiático vista a través da prensa escrita.
