DeportesGalerías de fotosÚltima hora

O XXIX Día da Bici de Trives reúne a 160 ciclistas de todas as idades

Os máis pequenos eran os primeiros en tomar a saída dende a Praza de Abastos ás 12h. do domingo 11 de agosto

Dende meniños ata veteranos. Cunha notable participación de ciclistas de todas idades desenvolvíase na mañá do 11 de agosto en Trives o XXIX Día da Bici. O seu punto de encontro era a Praza de Abastos, onde ás dez da mañá abríase a inscrición para poder tomar a saída nos percorridos: un para maiores e outro para os máis cativos. “É unha divertida actividade, agardada cada verán na vila, onde as familias, pais, nenos e avós, desfrutan dunha xornada de convivencia e deporte todos xuntos”, destacan dende o Concello da Pobra de Trives.

Ás doce do mediodía dábase a saída ao grupo dos máis pequenos, que pedaleaban arredor duns 400 metros polas rúas da vila. Despois era a quenda dos maiores, cun percorrido longo duns oito quilómetros que chegaba ata Santa María de Trives. Ao remate da proba os participantes volvían reunirse na Praza de Abastos, onde a organización deste evento (en mans do Concello da Pobra de Trives) procedía ao sorteo de dúas bicicletas. Os gañadores foron Marc Álvarez na categoría de 0 a 8 anos e Ramón González González na de 8 anos en adiante.

Os premios foron entregados pola alcaldesa de Trives, Patricia Domínguez, e polo concelleiro de Deportes, Miguel Sierra. Dende o Concello agradécese a colaboración nesta actividade deportiva da Policía Local e de Protección Civil de Trives, “que en todo momento velaron pola seguridade da proba”.

Fotos: Concello da Pobra de Trives.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close