Os días 22 e 23 de de abril celebrarase na praza Andrés de Prada, a segunda edición da Feira do Libro do Barco de Valdeorras, que contará con diferentes actividades en torno ao libro e ao fomento da lectura. Unha desas actividades é o obradoiro de Escrita Creativa que se realizará na Biblioteca P.M. Florencio Delgado Gurriarán de 11 a 12 horas tanto sábado como domingo.
Dende a biblioteca explican que deseñaron este obradoiro “pensando en todos os participantes que nos achegaron os seus contos para os concursos que se puxeron en marcha durante o ano 2016. Estamos moi orgullosos dos grandes escritores e escritoras que temos entre os máis pequenos e para eles creamos este espazo no que poderán potenciar as súas capacidades artísticas”, por iso convidan a participar aos nenos e nenas de entre 10 e 12 anos.
A actividade está deseñada seguindo o ensino creativo no que a través da análise de obras de arte de disciplinas como o cine, a pintura ou a música, se amosan novos modelos de linguaxe literaria.
O grupo de traballo é de 15 cativos e o período de inscrición estará aberto ata o 19 de abril. Os interesados deben descargar a folla de inscrición e entregala na biblioteca.
