Trabállase nas obras de reforma do Campo de Fútbol San Martiño de Quiroga. Neste proxecto de mellora inclúese a remodelación da herba do terreo de xogo, colocando un novo sistema de rego e replantando o céspede. Tamén se acondicionou o campo de adestramento coa colocación dunha capa de terra vexetal e a sementa de céspede. O proxecto incluía tamén a roza e retirada de maleza e a retirada de escombros dunha cancha demolida. Ademais traballase no peche do recinto co levantamento dun muro de bloque e a colocación dunha rede.
Aínda que con labores de mantemento habitualmente, o campo do San Martiño non acolleu grandes remodelacións dende hai unha década cando se construíron os novos vestiarios, se acondicionaron as gradas e se asfaltou o aparcamento, sinalan dende o Concello.
Co inicio destas obras do novo sistema de rego, que esta mañá visitaban o alcalde de Quiroga, Julio Álvarez, e o concelleiro de deportes, Andrés Novoa; ademais edil de Cultura, José Luis Rivera; o equipo de fútbol Quiroga F.C. que iniciou esta fin de semana a liga na segunda autonómica, non poderá disputar ningún partido na casa polo menos ata o mes de xaneiro.
Pistas Multideportivas do Parque da Constitución
Ademais da reforma do campo de fútbol, tamén se levan a cabo melloras nas Pistas Multideportivas do Parque da Constitución. Nestas dúas instalacións deportivas investiranse preto de 100.000 €. Serán dúas fontes de financiamento distintas coas que se conte para realizar estes traballos de mellora. Por unha parte a Secretaría Xeral para o Deporte da Xunta de Galicia aportará 48.394 €, mentres que do Plan Único da Deputación Provincial de Lugo investiranse outros 48.387´90 €.
En canto ás melloras proxectadas nas pistas multideportivas do parque da Constitución, xa se realizou a roza e limpeza do talude da parte de abaixo e agora vaise substituír a malla inferior e cerrarase a pista con madeira tratada.