En colaboración cos parques de bombeiros, a Deputación de Ourense e o Consorcio Provincial contra Incendios e de Emerxencia puxo en marcha un operativo de desinfección despregado en residencias de maiores da provincia para “contribuír a neutralizar os contaxios en lugares considerados prioritarios na estratexia fronte á pandemia”, en palabras do presidente Manuel Baltar.
A iniciativa, lévase a cabo en 12 residencias das comarcas de Verín, Valdeorras, A Limia e O Carballiño. Ademais o camión baldeador da Deputación está desinfectando aquelas localidades onde se rexistran persoas positivas en Covid-19 e as autoridades municipais solicitan o servizo, ata o momento: Xinzo, Barbadás, Monterrei, Oímbra, Cualedro e Vilardevós.
Os labores de desinfección en Valdeorras (Asfaval e N. Señora de Fátima) realízanse os luns. Os martes na Limia (residencias de Porqueira e Xinzo); os mércores no Carballiño (residencia para maiores con autonomía, As Caldas, residencia para persoas con dependencia e residencia Hermanos Prieto); e os xoves en Verín (Hogar Santa María, en Verín, e Hogar Santiago Apóstol, residencia para persoas maiores e vivenda comunitaria Santiago Apóstol, en Monterrei).
