O anexo do Pavillón dos Remedios de Ourense acollerá esta fin de semana o LXIV campionato de España xuvenil de hóckey sala, organizado polo Club Hockey Barrocás.
A presentación do evento deportivo que se desenvolverá do 9 ao 11 de febreiro, tiña lugar na mañá do 6 de febreiro no Concello de Ourense, contando coa presenza do alcalde Jesús Vázquez, o concelleiro de Deportes Mario Guede, o asesor deportivo da Deputación Bernardino González, o presidente da Federación Galega de Hockey Antonio Piñeiro e do presidente de CH Barrocás Jaime Amorin.
Tal como explicaron na presentación, ao longo da fin de semana pasarán pola cidade das Burgas os 8 mellores equipos de España, en categoría xuvenil. “Un cento de rapaces de entre 16 e 18 anos que no futuro inmediato serán parte da Selección Sub 21 e mesmo da Selección Absoluta”, dixo o alcalde. Entre os participantes, catro clubs de Terrassa (Club Deportivo, Egara e Atlétic), ademais do júnior do FC Barcelona. Tamén haberá dous de Madrid (Complutense e Club de Campo), o RS.Tenis de Santander e o Club Hocquey Barrocás de Ourense, que pecha o cadro como anfitrión.
O primeiro partido, entre C.D. Terrassa e SPV Complutense, comezará ás 11h. do venres e a final do campionato está prevista para o domingo a mediodía.
