Os alumnos de saxofón do Conservatorio C. Halfter de Ponferrada actúan no Barco

O vindeiro 21 de abril os alumnos da aula de saxofón do Conservatorio Cristobal Halfter de Ponferrada ofrecerán un concerto-audición ás 18:30h. no Teatro Lauro Olmo do Barco. Esta actuación enmárcase nun intercambio entre as aulas de saxofón do Conservatorio de Ponferrada e do Conservatorio e Escola de Música do Barco.

O repertorio incluirá unhas trece pezas entre as que figuran “Fantasía nº2” (G.P. Telemann), “La Locomotora” (A. De la Rosa/J. Librado), “Antifonax” (J.M. Diago), “Bali” (J.D. Michat) ou a “I Suite para cello (preludio)” de Bach. O concerto rematará cun tema conxunto entre os alumnos deste conservatorio ponferradino e os do conservatorio e a escola do Barco. Os saxofonistas barquenses devolveranlles a visita en maio.