Por sexto ano consecutivo o alumnado do Colexio Pablo VI-Fátima da Rúa celebra o “English Word” ou Día das Letras Inglesas cunha iniciativa moi especial na que os escolares practican o “reading, writing, espeaking and listening, tanto nas clases de inglés como en calquera outra actividade que se realice dentro e fóra do centro”, explica a súa profesora, Rocío Illesca.
Nesta ocasión esta actividade tiña lugar o martes 4 de xuño e nela un grupo duns 30 nenos de cuarto e quinto de primaria desprazábanse ata a Biblioteca Municipal da Rúa para ler libros da súa propia creación, algo que lle engadiu atractivo e participación á proposta. Relataban historias de ficción e outras cun trasfondo real. “A participación oral foi excelente”, di Rocío Illesca.
A novidade deste ano foi que os rapaces participantes fotografáronse xunto á típica cabina telefónica vermella de Londres e nun photocall dun autobús de dous pisos. “Quixemos traernos Londres á Rúa de Valdeorras, viaxar no tempo aínda que sexa por un rato”, destaca a profesora de inglés, quen ademais amósase “moi contenta por ver os resultados e o entusiasmo por parte dos meus alumnos ao utilizar o inglés como medio de comunicación entre eles”.
Fotos cedidas.