Dende hoxe, sábado día 7 de novembro, os autobuses urbanos do concello de Ourense circularán con prazas limitadas, atendendo as indicacións das autoridades sanitarias en vista da evolución da pandemia do Covid-19. Así, “só se poderán utilizar o 50% dos asentos dos vehículos, de forma que persoas non conviventes non ocupen espazos contiguos. As prazas para viaxar de pé reduciranse ao 25%”, explican dende o Concello.
A administración local adopta esta medida tras realizar unha consulta á Dirección Xeral de Mobilidade sobre a aplicación aos autobuses municipais da orde do día 4 de novembro da Consellería de Sanidade pola que se establecen medidas de prevención específicas pola evolución da enfermidade. “Aínda que a norma non cita expresamente aos autobuses municipais, as restricións sonlles tamén aplicables”, informou a Xunta ao Concello.
Dende o Concello de Ourense solicitan aos usuarios que “durante os próximos días procuren utilizar os autobuses urbanos só se resulta necesario, dada a limitación de prazas existente. Realizaremos un seguimento diario dos servizos para adoptar as medidas que, no seu caso, sexan precisas”, aseguran.
