Seguen baixando os casos activos de Covid-19 na provincia. Segundo os datos notificados hoxe pola Consellería de Sanidade (actualizados ás 18h. do 4 de decembro), rexístranse 419 positivos (17 menos que onte), mentres as hospitalizacións en planta son 36 (3 menos que onte) e 5 na UCI (1 menos que onte). Os novos casos confirmados por PCR nas últimas 24 horas baixan a 13 (fronte aos 22 de onte).
Con respecto aos ingresos o Hospital de Valdeorras conta hoxe con 5 pacientes con coronavirus en planta (os mesmo que onte), mentres que o Hospital de Verín ten 2 e o Hospital Universitario de Ourense rexistra 29 en planta e 5 na Unidade de Coidados Intensivos.
O total de casos rexistrados ata o de agora na provincia ascende a 7.651, con 6.937 curados e 294 falecidos. Polo de agora lévanse realizado 117.423 probas PCR e 65.171 probas serolóxicas.
6.948 casos activos de Covid en Galicia
O número de casos activos de coronavirus en Galicia é de 6.948 deles 1.430 son da área da Coruña, 829 da de Lugo, 419 da de Ourense, 1.025 da de Pontevedra, 1.842 da área de Vigo, 807 da de Santiago, e 596 da de Ferrol.
Do total de pacientes positivos, 61 están en UCI, 337 en unidades de hospitalización e 6.550 no domicilio. Polo de agora, en Galicia hai un total de 45.712 persoas curadas, rexistrándose 1.246 falecementos. O número de PCR realizadas é de 927.833.
