A Dirección Xeral de Centros e Recursos Humanos vén de facer público o nome dos dez centros de Galicia galardoados na iniciativa ‘Voluntariado de lectura’ dentro do programa Bibliotecas Escolares Solidarias entre un total de 64 centros presentados, entre os que figuran o CEIP Manuel Bermúdez Couso da Pobra de Trives e o CEIP Virxe do Carme de Sober.
O programa de Voluntariado de Lectura-A (Primaria) premia así a estes dous colexios cunha achega de 600 euros para o desenvolvemento dun obradoiro especializado destinado a aqueles alumnos que tiveran un papel protagonista dentro do grupo de voluntairos participando no deseño e xestión de actividades na biblioteca escolar.
O obradoiro deberá versar sobre lectura expresiva, narración oral, escrita creativa, a radio como medio de comunicación, a elaboración de booktrails, os xogos cooperativos e tradicionais ou a música e danza tradicionais.
Será o equipo de bibioteca quen decida as configuración do grupo que participe nos obradoiros, dentro dos límites da propia actividade para un mellor aproveitamento. A través da Asesoría de bibliotecas escolares os centros recibirán cumprida información para o desenvolvemento destes obradoiros que deberán realizarse antes do 15 de xuño deste ano.
Como actividade integrada nos programas de voluntariado da Dirección Xeral de Xuventude, Participación e Voluntariado, o alumnado directamente implicado e responsable das actividades de voluntariado da lectura e de atención á biblioteca escolar, de todos os centros inscritos no seu momento, recibirá material divulgativo do programa.