SanidadeÚltima hora

Os centros de saúde e hospitais ourensáns prepáranse para atender á gripe

A EOXI ourensá elaborou un plano de actuación que recolle as accións e recursos a mobilizar en función dos diferentes escenarios da epidemia

Exterior do Centro de Saúde do Barco./ Foto: O SIL.

 

Moi transmisible e con graves complicacións nas persoas de idade avanzada ou saúde fráxil. Así é a enfermidade da gripe que, anualmente, causa en Ourense centos de ingresos hospitalarios, multiplicando as consultas nos centros de saúde, servizos de Urxencias e Puntos de Atención Continuada (PAC), en paralelo ao avance da epidemia.

Co obxectivo de dar unha “resposta efectiva a este esperado aumento das necesidades asistenciais”, a Xerencia de Xestión Integrada de Ourense, Verín e O Barco de Valdeorras vén de elaborar un plano de actuación, que recolle as accións e recursos a mobilizar en función dos diferentes escenarios da epidemia, tal e como sinalaban os seus responsables nunha rolda de prensa celebrada nesta mañá de 4 de outubro en Ourense.

Con este plan coordínase a actuación, dos distintos centros e servizos, para facer fronte ao esperado aumento da frecuentación de pacientes, nos Centros de Saúde, os PACs e os servizos de Urxencias hospitalarios, así como o incremento de ingresos. “No caso de Ourense, a incidencia desta epidemia estacional é especialmente significativa tendo en conta o envellecemento da poboación, con maior risco de complicacións, en pacientes con procesos previos, e descompensacións en pacientes crónicos”, segundo a EOXI ourensá.

O plano foi elaborado tendo en conta tamén a experiencia e os resultados de anos anteriores e, na súa redacción, participaron responsables médicos e de enfermería de Atención Primaria e dos tres hospitais da provincia. Igualmente, foi sometido a consulta das áreas de xestión económica, servizos xerais e recursos humanos.

Está previsto que unha comisión de seguimento coordine as medidas a tomar e se reforce cos distintos grupos de traballo multidisciplinares existentes, como os de estudo da cronicidade e paciente fráxil, contando, en cada momento, cos profesionais e responsables dos distintos servizos de atención primaria e coordinadores dos PAC.

O plan contempla tres aspectos clave: prevención, vixianza e medidas operativas. Na presentación do plano, o director de procesos asistenciais, Javier Puente, destacou por riba delas a vacinación, “o método mais efectivo para limitar a incidencia de casos e os custes en vidas, deterioro da saúde, problemas sociais, laborais e de sobrecarga do sistema sanitario público durante a epidemia”. Nese senso, reiterou a importancia de achegar a vacina a poboación mais vulnerable, incluída entre os grupos de risco aos que se lle aconsella a vacinación de gripe.

Ademais, o director de procesos, subliñou que a protección de toda poboación pasa por asegurar a saúde dos que a coidan, especialmente ante a expectativa dun periodo con maior necesidade de coidados, como durante a epidemia. Por elo, animou aos profesionais sanitarios á protexerse vacinándose, unha vacina segura e de eficacia demostrada, clave tamén para evitar trasmitir este virus aos seus pacientes e ás súas propias familias, dada a súa maior exposición laboral.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close