Os corredores do Tres Lunas Valdeorras seguen dando alegrías ao club ciclista. Hai uns días, o xefe de filas Brandan Márquez subía o terceiro caixón do podio na Transgalaica 2020 de Cotobade e o vindeiro 29 de febreiro, Constantino Arias Arias, máis coñecido como Tito Arias, recollerá un dos premios que a FGC entregará na Gala do Ciclismo Galego’19 que se celebrará en Pontevedra.
Tito ten 62 anos e é natural de Sotillo aínda que actualmente está afincado en Quereño (Rubiá), facendo da Serra da Enciña da Lastra o seu particular ximnasio para os adestramentos sobre a bicicleta, e recollerá o premio pola medalla de bronce conseguida o ano pasado no campionato de España máster 60A Cross Country Ultramaratón en Calamocha (Teruel).