Nesta semana veñen de comezar no Alto do Cerengo os traballos de instalación dunha torre meteorolóxica que debe validar que todos os cálculos feitos por expertos matemáticos son correctos e así dar luz verde a construción do parque eólico Río-Trives, tal e como se informa dende estes dous concellos.
A torre, que terá unha altitude de 100 metros, é de celosías tubulares de aceiro cunha planta baixa triangular. Para cada un dos 3 planos utilízanse tres conxuntos de cables pretensados para estabilizar a torre a diferentes alturas. Os equipos que se instalarán na torre, anemómetro e veleta, permitirán detectar cal é a mellor colocación para cada torre eólica.
Neste 2020 os Concellos de Río e Trives apoian esta iniciativa na que, aseguran, “non haberá impacto ambiental”, unha cuestión que preocupaba aos rexedores. As parroquias de Navea en Trives e As Cabanas en Río serían, aseguran, as principais beneficiarias deste investimento.
Os dous concellos apostan “por enerxías limpas” e isto sería un paso máis na estratexia iniciada en ambos casos coa súa inclusión no Pacto das Alcaldías polo Clima e a Enerxía e a consecución da Bandeira Verde para estas localidades.
O futuro parque eólico Río-Trives será de 50 MW e xa leva un ano de proceso administrativo no rexistro eólico da Xunta de Galicia. O investimento a realizar sería de 40 millóns de euros e, unha vez instalado, xeraría xa directamente en alugueres do terreo máis de 100.000 €/ano que repercutirían sobre todo nas comunidades de montes de Navea e As Cabanas, segundos os concellos de Río e Trives.
O proxecto deste parque contitúe, din, unha mostra máis da aposta de ambos gobernos locais “polo traballo en conxunto e polo desenvolvemento do rural que, sen dúbida será un revulsivo na comarca” xunto con outros proxectos nos que levan tempo traballando.
