ConcellosÚltima hora

Os concellos piden máis información da crise e sentarse co Estado e coa Xunta para abordar a recuperación económica

Así o sinalaba o presidente da Federación Galega de Municipios e Provincias, tras a reunión desta mañá do Centro de Coordinación Operativa

Reunión do do 5 de maio do Centro de Coordinación Operativa (Cecop).

 

O presidente da Federación Galega de Municipios e Provincias (Fegamp), Alberto Varela, plantexaba unha vez máis na reunión deste martes 5 de maio do Centro de Coordenación Operativa (CECOP) a “necesidade dos concellos de ter máis información, neste caso falamos xa da desescalada, que vai ser por ámbitos territoriais inferiores á comunidade autónoma, como pode ser a provincia. Para os alcaldes e alcaldesas sería importante que a Xunta de Galicia compartise esa información para que poidamos realizar as previsións adecuadas nos municipios”.

En declaracións realizadas ao termo da xuntanza, Varela sinalaba que dende a Fegamp pedirónselle, tanto á Xunta como ao Goberno central, “protocolos claros de utilización de mascarillas por parte da poboación, xa que cada concello está facendo unha cousa distinta, temos que saber o papel que debemos xogar as administracións locais nese posible reparto”.

Unha terceira cuestión que plantexaba o pesidente da Fegamp na xuntanza era a necesidade de que os concellos “tamén nos sentemos a avaliar as consecuencias económicas desta crise sanitaria coas demais administracións e que poidamos falar nunha mesa de recuperación económica na que cada un poña enriba da mesa as avaliacións, como vai afrontar a situación cada administración e cales son as axudas e as previsións existentes. É necesario que se comparta esa información e que poidamos poñer os nosos plantexamentos enriba da mesa para que as liñas de acción de cada unha das administracións sexan complementarias unhas con outras e para evitar que nos solapemos e perdamos esforzos e recursos”, indicaba.

A preguntas dos xornalistas, Alberto Varela indicaba que non se lles facilitou aos concellos galegos información epidemiolóxica local. “Esa información non se trasladou no Cecop nin tampouco se lle trasladou á Fegamp. Dende o principio da crise sanitaria foron moitos os alcaldes que nos pediron que lle trasladásemos á Xunta que sería convinte dar a evolución da epidemia en cada un dos municipios, pero a administración galega, que é quen ten a competencia, díxonos en todo momento que esa información non se podía dar. Ata o de agora tampouco temos información sobre os plans de camas hospitalarias ou de como vai a situación de cada unha das provincias”.

Os concellos e as axudas á recuperación económica

Outro dos temas nos que incidía o presidente da Fegamp era na importancia da participación dos concellos nas axudas á recuperación económica. “Na anterior reunión do Cecop falamos da posibilidade de que parte dese fondo extraordinario de recuperación polo Covid que se transferíu á comunidade autónoma sexa tamén para as administracións locais, tal e como están facendo noutras comunidades, e tendo en conta que estamos asumindo tamén gastos extraordinarios. O que lle estamos pedindo á Xunta e ao goberno do Estado é que nos sentemos todos xuntos nunha mesa para ver as medidas que van a adoptar e cales son as previsións. Non nos olvidemos de que, tal e como está recoñecido constitucionalmente, os concellos financiámonos cos nosos tributos pero tamén coas transferencias do Estado e da Xunta”, destacaba Alberto Varela.

Finalmente, aseguraba que tamén as administracións locais van ter problemas de liquidez a fin de ano, “por iso é importante que nos sentemos coas demais administracións porque se o Concello vai facer ese esforzo de cara aos seus veciños, hai que ver como se van soster esas arcas municipais porque sabemos que imos pasar unha situación complicada”.

 

 

 

Artigos relacionados

Back to top button