A edición 2016 da Rebusca prevista para esta fin de semana en Manzaneda, será moi especial, cunha dobre celebración. Por unha banda o décimo aniversario do festival alternativo e, por outra, o vinte aniversario dos Cuchufellos.
A numerosa banda, orixinaria de Manzaneda leva dúas décadas actuando dentro e fóra de Galicia, protagonizando un directo explosivo con ritmos electrizantes e pezas cargadas de enerxía, que este ano decidía despedirse dos escenarios. E que mellor lugar para facelo que na casa, no espazo ao que sempre estivo vencellado. Por iso a eles estará adicada a primeira xornada do festival, o venres día 18 de novembro no Toural a partires das dez e media da noite, rodeados polos “grupos amigos que sempre xiraron ao noso redor” din dende a banda. Aí estarán Zurrumalla (22:30-23:45h.); Cuchufellos (00:10-01:25h.); Tres Trebóns (01:50-03:05h.); La Tarrancha (03:30-04:45h.); e Djs (05-07h.).
A festa continuará ao día seguinte, sábado 19 de novembro no local da Asociación Cultural A Rebusca a partires das seis da tarde, coa sesión infantil de Chuches Amil e a actuación de Labregos do tempo dos Sputniks. Xa pola noite, a partires das dez e media e de novo na nave do Toural, comezarán os concertos de Poetarras (22:30-23:45h.); Freak Fandango (00:10-01:25h.); Ruxe Ruxe (01:50-03:05h.); La Trocamba Matanusca (03:30-04:45h.); e Brigada Am (05-07h.).
Como en edicións anteriores habilitarase unha zona de campismo no pavillón e a entrada poderá mercarse unicamente na taquilla, podendo escoller entre dúas opcións: para un único día por 7 euros ou para os dous días por 10 euros.
Máis información na edición en papel do Periódico O Sil.