Este ano, as uvas deste Fin de Ano serán tomadas coas badaladas do reloxo do Castelo de Castro Caldelas polos galegos residentes en Cataluña. Así o adianta a alcaldesa, Sara Inés Vega, asegurando que xa está todo a punto para que hoxe a medianoite “os galegos residentes en Cataluña coman as uvas e reciban o novo ano 2022 coas badaladas desde o reloxo da vila caldelá”.
A propia alcaldesa da vila de Castro Caldelas será a encargada de presentar o evento despois dun video promocional previo. De seguido soarán as badaladas que levarán a Cataluña o son das campás do Castelo mentres toman as 12 uvas e ao remate Sara Inés Vega felicitará o 2022 a todos os galegos residentes na diáspora.
Dende o Concello de Castro Caldelas dan as grazas “ás entidades galegas de Cataluña, moi especialmente a Airiños da Nosa Galicia e á Federación de Entidades Galegas en Cataluña por permitirnos achegarnos aos seus fogares e compartir con eles a promoción da nosa terra”, cunha colaboración que terá continuidade o vindeiro ano “coa promoción do Camiño de Santiago desde Castro Caldelas donde nos acompañarán para dar a coñecer este Itinerario Cultural da Ruta Xacobea”, adianta a alcaldesa.