En portada

Os grupos políticos barquenses ven satisfactoria a decisión da DGT de manter os exames teóricos

Emitían unha declaración institucional conxunta, que lle será remitida aos concellos valdeorreses para que a asinen, e logo enviada a Tráfico
O alcalde en funcións do Barco, Aurentino Alonso, xunto aos portavoces municipais de Riada Cidadá e do PP, na rolda de prensa do 20 de xullo./ Foto: Ángeles Rodríguez.
O alcalde en funcións do Barco, Aurentino Alonso, xunto aos portavoces municipais de Riada Cidadá e do PP, na rolda de prensa do 20 de xullo./ Foto: Ángeles Rodríguez.

A volta atrás na decisión anunciada o venres 17 de xullo pola Dirección General de Tráfico (DGT) de suspender os exames teóricos de conducir no Barco a partires do 5 de agosto é valorada de xeito “satisfactorio” polos grupos políticos barquenses. Así o manifestaban a través dun comunicado conxunto, tras manter unha reunión na mañá do 20 de xullo na que participaban o alcalde en funcións, o socialista Aurentino Alonso, o portavoz municipal do PP, Arsenio Moldes, e o de Riada Cidadá, Félix García.

Sen embargo, tamén matizaban na declaración institucional realizada que “consideramos necesario seguir vixiantes porque o “globo sonda” lanzado polo Goberno e as formas utilizadas para iso (anuncio repentino, dun día para outro), fainos pensar que se trata dunha decisión que podería deixarse en suspenso durante un tempo, pero volver a retomarse nun futuro próximo. Hai que recordar que a primeiros dos anos 80 xa houbo unha tentativa para quitalo”.

Os representantes políticos barquenses tamén aseguran no documento que os criterios esgrimidos para “xustificar a centralización resúltannos incomprensibles e alonxados da realidade: falar de modernización e accesibilidade, cando para os veciños de Valdeorras este feito supón un grave prexuízo de tempo, cartos e alonxamento da administración é unha contradicción que os valdeorreses non podemos entender”.

E apúntase que a “DGT, coma outros organismos do goberno central, tomaron esta decisión sen pensar nas repercusións que este feito pode provocar nas poboacións e bisbarras ás que afecta a centralización dos exames. Non se falou nin se negociou, nin se valoraron os pros e as contras, senón que se comunicou, tanto ás autoescolas coma ao Concello, coma un feito consumado”.

Ademais Aurentino Alonso matizaba que no caso de que a DGT lle pedise ao Concello un espazo exclusivo para este tipo de probas “nós amosámonos dispostos a colaborar con eles para lograr o mantemento dos exames”.

O portavoz municipal do PP, o edil Arsenio Moldes, apoiaba tamén o comunicado e destacaba que “non nos poden quitar os servizos que temos” e ademais nunha decisión tomada “sen poñerse en contacto cos afectados”. Na mesma liña se expresaba o concelleiro de Riada Cidadá, Félix García, incidindo tamén en que “a tecnoloxía de hoxe permite calquera proba a distancia”.

A comunicación de que os exames se ían manter facíase vía telefónica dende Tráfico ao Concello e ás autoescolas. A declaración institucional do Concello do Barco asinada polos tres grupos municipais será remitida ao resto dos concellos da comarca para que a rubriquen e logo enviada á DGT.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close