Os voluntarios de Protección Civil de Parada de Sil levábanlle nestes días unha carta aos cativos deste municipio cunha proposta moi especial. O alcalde, Aquilino Domínguez, convídaos a debuxar “nun folio algo sobre este momento raro que estás vivindo, o que mellor che pareza. Podes presentar dous debuxos, sempre firmados. Recolleranos na última semana de maio e colgarémolos todos no concello, na sala de usos múltiples”.
Máis adiante, cando a situación o permita, os cativos participantes poderán escoller o debuxo que máis lles guste e o autor do que teña máis votos recibirá un libro como agasall. Tamén haberá unha merenda para todos.
Ademais os voluntarios de Protección Civil explicaranlle aos rapaces en que consiste o seu labor e amosaranlles os vehículos e os medios dos que dispoñen, “e poderedes tocar as sirenas e así irvos animando a apuntarvos de voluntarios cando teñades idade”, di tamén na carta o rexedor, que se despide desexándolles moito ánimo.