O Campionato de Europa de Rallys Históricos continuará esta fin de semana para o Aukor Racing. O equipo ourensán formado por Carlos Sampayo e Álex Cid afronta desde este venres 7 de maio o Historic Vltava Rallye, segunda cita puntuable para o certame e que esta vez levaralles ata a República Checa.
O esperanzador debut en chan italiano o pasado mes de abril fai que Sampayo e Cid afronten coa moral alta esta carreira, que do mesmo xeito que sucedeu en Sanremo será nova para eles. Fronte a ese hándicap, a táctica para utilizar será a mesma, “coñecer as especiais e ir subindo o ritmo progresivamente dentro dunha seguridade que lles permita completar a cita, verdadeiro obxectivo do Aukor Racing Team“, aseguran.
Co dorsal 21 nas portas do Renault 11 Turbo, o equipo de Escuadra Ourense poñerá sobre as sempre complicadas estradas checas as últimas melloras e retoques de posta a punto realizadas no vehículo francés, sempre asesorados por Sergio Vallejo.
Na lista de rexistrados, 64 equipos de dez nacionalidades e unha competencia feroz (é a primeira cita puntuable para o campionato da República Checa de vehículos históricos), para un rallye que se disputará nun formato de dúas xornadas na contorna da cidade de Klatovy, preto da fronteira con Alemaña. Tras realizar o shakedown o xoves, Sampayo e Cid disputarán o venres cinco especiais (con inicio ás 16 horas) e o sábado outras sete (desde as 8:37 e ata as 16 horas aproximadamente), para un total de 13 tramos e 135 quilómetros contra o cronómetro.
