O equipo ourensán Aukor Racing, composto por Carlos Sampayo e Álex Cid, comeza esta fin de semana en Italia o Campionato de Europa Históricos aos mandos do seu renovado e mellorado Renault 11 Turbo.
Sampayo e Cid afrontan con ilusión este programa polo continente europeo, co firme propósito de “gozar da experiencia e obter o título na súa clase a final de tempada”. Por diante, un calendario de nove probas, co Rally Sanremo como primeira parada.
Durante o venres e o sábado, o equipo de Escuadra Ourense disputará as dúas xornadas de competición nun formato de 6+8 especiais e 131 quilómetros cronometrados, nun competición que reuniu unha lista de rexistrados de máis de 350 participantes entre todas as probas puntuables. Antes, o xoves, será a quenda do tramo de probas ( shakedown), no que percorrerán os primeiros quilómetros da tempada, probarán as melloras incorporadas no Renault 11 Turbo e buscarán a mellor posta a piques de cara ao comezo da competición. Na cita de históricos na que participarán Sampayo e Cid, os ourensáns recibiron o dorsal 55, encadrados dentro da categoría E3, na que buscarán o título continental.
“Afrontamos a participación no Campionato de Europa de Rallys con moita ilusión e co desexo de facer que os ourensáns sentan orgullosos de nós. É un proxecto que preparamos con moita calma, por iso cremos que estamos preparados para afrontalo con garantías. Temos toda a ilusión do mundo e queremos conseguir un bo resultado no noso debut en Sanremo. Sabemos que haberá rivais dun grandísimo nivel, pero imos facelo o mellor posible e a sumar todos os puntos que podamos para conseguir o obxectivo final, que é o título europeo na nosa clase. Melloramos moito o coche e ademais contaremos co asesoramento de Vallejo Racing, que nos axudará coa posta a punto do Renault 11 Turbo durante esta tempada”, asegura o piloto Carlos Sampayo.
A lista de inscritos conta con 77 equipos de diversas nacionalidades.
