O grupo do PSdeG-PSOE no Parlamento galego vén de iniciar unha serie de encontros cos colectivos sociais e empresariais galegos. Nese senso, o portavoz do grupo socialista, Xoaquín Fernández Leiceaga comprométese a levar ao Parlamento iniciativas de impulso e control do goberno para vixiar a creación dunha “lexislación de emprego de calidade, con salarios dignos, en boas condicións”. E asegura que “poderemos ver se os funcionarios e traballadores da administración recuperan o seu poder adquisitivo” e se o goberno realiza un “maior esforzo na formación ocupacional, a prevención de riscos ou fronte ás dificultades do mercado de traballo”.
O primeiro destes encontros producíase o 14 de novembro coa visita ao sindicato CC.OO. Leiceaga coincidía co secretario xeral de CCOO na necesidade de afrontar a reforma dos servizos públicos de emprego, para “convertelos en algo máis eficaz” e en facer que a chamada axenda de competitividade 4.0 “pase de ser unha mera declaración de intencións a concretarse na práctica do Igape, no impulso da formación e na promoción de solo empresarial”.
Nesta reunión tamén participaban os portavoces de Política Social e Emprego e de Orzamentos, Industria e I+D do PSdeG, os ourensáns Noela Blanco e Abel Losada, respectivamente, e da secretaria de Política Social e o secretario de Acción Sindical do sindicato, Adela Poisa e Xesús Castro.
Leiceaga tamén se refería no decurso deste encontro ao inicio inminente do debate de Orzamentos para o ano 2017. Este debate, indicaba, “daranos a oportunidade de ver se as boas intencións do presidente da Xunta se levan ás leis e á práctica política real”.