En vista de que dende o Concello non dan arrancado coa programación do Entroido deste ano (apenas quedan tres semanas para o día grande) son os propios veciños os que se están mobilizando para deixar ben claro que o de Laza, segue sendo un dos Entroidos máis tradicionais, enxebres e populares de Galicia, e que está máis vivo que nunca.
“Sempre foi a festa do pobo, dos veciños, e así queremos que siga sendo”, aseguran os que viven e senten estas datas. E para demostralo, a poboación estase involucrando, cada persoa na medida das súas posibilidades, organizándose para o “1º Folión do Entroido do pobo”, unha xuntanza multitudinaria que sairá o venres 15 de xaneiro ás once da noite dende o fondo da Cerdeiriña.
Chocos, fachóns, bombos, cacerolas, latas, e veciños con ilusión e ganas de festa, no punto de partida do Entroido de Laza 2016.
