Na xornada do 16 de abril arrancaba na Fira de Barcelona unha nova edición do prestixioso Salón Internacional de Alimentación e Bebidas, Alimentaria 2018, onde se están a promocionar os viños da Denominación de Orixe Valdeorras, ademais dos doutras ourensás como Monterrei, Ribeiro e Ribeira Sacra.
Este foro, que se celebrará ata o 19 de abril, constitúe, en palabras do presidente do CRDO Valdeorras, José Luis García Pando, “un escaparate excepcional para os brancos e tintos de Valdeorras, que debemos aproveitar para achegar os nosos viños a diversos públicos especializados, pero tamén a consumidores finais”.
A D.O. Valdeorras conta cunha superficie de exposición propia, onde os diferentes profesionais que se achegan a coñecer os viños reciben explicacións do seu director técnico, Jorge Mazaira. Ademais no túnel do Viño de Intervín, no marco desta mostra, participan marcas valdeorresas da Adega Santa Marta, Guitián y Blanco e das cooperativas do Barco e da Rúa.
Fotos: CRDO Valdeorras.