No decurso da emerxencia sanitaria do coronavirus o papel dos voluntarios de Protección Civil ten sido clave, especialmente, nunha provincia cun gran peso do rural como é Ourense. Mobilizáronse máis de 540 voluntarios de 69 das 73 AVPC (Agrupacións de Voluntarios de Protección Civil) ourensás e o persoal de oito dos nove GES (Grupos de Emerxencia Supramunicial)/SMPC que existen na provincia de Ourense que están realizando labores de desinfección, apoio aos servizos sociais en atención a persoas maiores, reparto de alimentos, etc.
Entre o total de operativos efectuados polas AVPCs ata o día de hoxe, cifrado en 38.804 labores, sobresen os relacionados con asuntos sociais, concretamente os 9.811 repartos de alimentos e medicamentos en 70 concellos, así como os 9.828 de visitas a persoas que viven soas para comprobar o seu estado.
Estes datos dábanse a coñecer durante unha reunión que a delegada da Xunta en Ourense, Marisol Díaz, mantiña esta mañá por videoconferencia con responsables de oito agrupacións da provincia, na que tamén participaron o xefe territorial da Vicepresidencia, Manuel Pardo, e o xefe de servizo de Emerxencias, Olivier Reboredo. Na xuntanza telemática estiveron representadas as AVPC de Manzaneda, O Pereiro de Aguiar, Cortegada, Ribadavia, Maceda, Sarreaus, San Cristovo de Cea e Verín.
No decurso deste encontro tamén se puxo en valor o labor de desinfección que estas agrupacións, en coordinación coas brigadas de Medio Rural, bombeiros do CIS e os bombeiros do parque municipais de Ourense, desenvolvían en 118 centros sociais. Os menos numerosos son os de información a persoas sen teito, os de aviso a poboación por megafonía ou os de apoio loxístico a medios de intervención.
No caso de GES/SMPC, nos que participaron todos os existentes na provincia agás o do Barco de Valdeorras, destacan os operativos de desinfección en lugares de pública concurrencia que acadaron a cifra de 2.318.
Segundo recalcou Marisol Díaz, estas agrupacións constitúen un referente na nosa sociedade, xa que o seu traballo merece un continuo recoñecemento por parte dos cidadáns. Ademais agradeceulles o seu labor “calado e desinteresado que os converten nun piar indispensable da sociedade”.