Dous días intensos na capital belga. Un grupo de dez mozos empresarios ourensáns foron até Burxelas para coñecer de preto como se desenvolve a vida política e económica nesta cidade, sobre todo nos aspectos que afectan aos intereses galegos.
Os empresarios levaron a cabo un programa de visitas e relatorios en distintas institucións europeas. Tras a súa chegada o domingo, o luns a primeira hora comezaba a axenda coa visita á Fundación Galicia Europa, onde foron recibidos pola directora da súa oficina en Bruxelas, Ana Ramos, quen lles explicou en que consiste a tarefa de intermediación deste organismo, que apoia a institucións, empresas e sectores estratéxicos galegos nas súas xestións na capital belga, sobre todo á hora de debater na normativas europeas que lles poidan afectar, ou as distintas axudas para os colectivos empresariais e o emprendemento.
A continuación, a representación da AJE Ourense foi ao Parlamento Europeo onde tivo lugar o almorzo e foron recibidos por Francisco Milán Mon, quen lles explicou a función dun eurodeputado e de que xeito as súas decisións inflúen na consecución de intereses para a rexión que representan.
A Comisión Europea foi a primeira cita do martes, 7 de novembro, da delegación de AJE Ourense, un grupo de xoves empresarios de diversos sectores foron acompañados por Santiago Álvarez, responsable na provincia da consellería de Economía, Emprego e Industria, quen participou no deseño do programa de distintas visitas en Bruxelas.
Até o xantar, os empresarios ourensáns asistiron a distintos relatorios na Comisión Europea, en concreto a dous centrados no colectivo que representan “A Unión Europea e os emprendedores: Programa Cosme e Programa Horizonte 2020” onde compartirán experiencias e información cos outros xoves empresarios e puxéronse ao día sobre a actualidade e a dirección que toma o emprendemento na Unión Europea.
Tras o xantar no Comité das Rexións visitaron esta institución de mans de Jesús Marcial Méndez, administrador e recursos humanos, para coñecer a funcións deste organismo, que representa as entidades rexionais e locais dos estados membro por medio da asemblea dos seus representantes.
O presidente da asociación ourensá, Lois Babarro, valorou como moi interesante esta visita que lles está permitindo “coñecer desde dentro o que leva a cabo desde Bruxelas e como afecta á nosa vida e traballo diario a través da lexislación e as axudas que financian os fondos europeos, que se negocian e debaten aí a través de institucións como a Fundación Galicia Europa”. Babarro agradeceu igualmente a implicación da Delegación Territorial da Xunta en Ourense, que apoiou esta iniciativa en todo momento.